Í störfum mínum sem lögmaður sl. ár hafa margir verið að velta því fyrir sér hvort að eftirlifandi maki geti setið í óskiptu búi án samþykkis barna.
Óskipt bú felur það í sér að eignum og skuldum hins látna verður ekki skipt milli erfingja heldur tekur eftirlifandi maki við þeim. Heimild til setu í óskiptu búi og um nánari réttaráhrif og takmörk þeirrar heimildar er fjallað um í II. kafla erfðalaga nr. 8/1962.
Frumskilyrði heimildar til setu í óskiptu búi er auðvitað að hið langlífara sé maki hins látna. Ef hinn látni átti börn sem ekki eru börn eftirlifandi maka er seta í óskiptu búi háð samþykki stjúpbarna eða eftir atvikum forráðamanna þeirra. Slíkt samþykki þarf hins vegar ekki sérstaklega þegar um er að ræða sameiginleg börn aðila.
Einstaklingar í hjúskap geta tryggt með erfðaskrá heimild eftirlifandi til setu í óskiptu búi. Hafi hinn látni látið eftir sig erfðaskrá þar sem segir að eftirlifandi maka hans sé heimilt að sitja í óskiptu búi með börnum hins látna, á maki rétt á því, án þess að samþykki barna þurfi sérstaklega til að koma.
Aníta Óðinsdóttir lögmaður á og rekur lögfræðistofuna A lögmenn . Netfang stofunnar er alogmenn@alogmenn.is
