Hvað var í matinn heima hjá þér þegar þú varst barn?
Ef við færum okkur aftur til ársins 1970 væri svarið líklega talsvert öðruvísi en í dag. Engar pizzur pantaðar með appi, lítið um sushi og avókadóið var ekki beinlínis fastagestur á íslenska matarborðinu. Kjúklingabringur varla þekktust.
Einfalt og saðsamt
Á mörgum heimilum var maturinn einfaldur og saðsamur. Fiskur var mjög algengur, soðin ýsa með kartöflum og smjöri. Saltfiskur, fiskibollur og plokkfiskur voru líka kunnuglegir réttir og afgangar voru gjarnan nýttir í næstu máltíð.
Kjötið átti auðvitað sinn fasta sess. Lambakjöt, hrossakjöt, kjöt í karrý, hakk og buff, bjúgu, kjötfars og saltkjöt voru meðal þess sem gat ratað á borðið. Meðlætið var gjarnan soðnar kartöflur og soðsósa eða hvít sósa. Lambalæri eða hryggur á sunnudögum með rauðkáli og grænum baunum var á mörgum heimilum hefð.
ORA var feykivinsælt
Fiskibollur og steiktur fiskbúðingur úr dós frá ORA voru fljótlegur hversdagsmatur á mörgum heimilum. Fiskibollurnar með karrísósu eða bleikri sósu vekja eflaust upp minningar hjá mörgum
Grænmetisúrvalið takmarkað
Grænmetisúrvalið var heldur ekki alveg það sama og við eigum að venjast í dag. Kartöflur, gulrætur, rófur og hvítkál komu oft við sögu, en litríkt ferskt salat með hverri máltíð var ekki algengt.
Eftirréttir
Á mörgum heimilum þótti máltíðin ekki fullkomin nema eitthvað kæmi á eftir. Hrísgrjónagrautur, makkarónusúpa, kakósúpa eða ávaxtagrautur fylgdu oft aðalréttinum.
Morgunmatur og kvöldmatur voru líka einfaldari en víða í dag. Hafragrautur, brauð, slátur, súrmjólk, skyr og mjólk voru jafnan á borðum landsmanna.
Höldum enn í gamlar hefðir
Þótt mataræðið hafi breyst mikið á rúmri hálfri öld er merkilegt hvað margt af þessum gamla heimilismat lifir enn góðu lífi. Margir af þessum klassísku réttum eins og soðin ýsa með kartöflum, kjöt í karrý og hrísgrjónagrautur eru enn reglulega á borðum landsmanna.
Hvað var algengt að væri á borðum á þínu æskuheimili ?
